نبض الجماهير: ما بين مؤيد ومعارض لرحيل البدري يبقى القرار في يد الإدارة

استمراراً لخدمة نبض الجماهير يقدم

لقرائه تعليقات مختارة من جماهير النادي الأهلي من صفحة الموقع عبر الفيس بوك ومنتدى جماهير الأهلي حول رؤيتهم في استمرار حسام البدري على رأس القيادة الفنية للفريق الأول لكرة القدم بالنادي من عدمه عقب الهزيمة أمام الاسماعيلي بأربعة أهداف مقابل هدفين.

حيث انقسمت جماهير النادي الأهلي إلى فريقين، فريق يطالب برحيل الكابتن حسام البدري والاستعانة بمدير فني أجنبي يقود الفريق فيما تبقى من مباريات في البطولة الأفريقية والدوري العام وفريق آخر يضع ثقته في البدري حيث يرى أن مباراة الاسماعيلي ليست سوى تحصيل حاصل ولا يجب تقييم الجهاز الفني بالقطعة، والرأيين مع اختلافهما إلا أنهما يهدفان إلى مصلحة النادي الأهلي حسب وجهة نظر أصحابها.

مع تغيير الجهاز الفني

حيث قال Ahmed El Feshawy " احنا الموسم ده ننسى اى بطولة وربنا يعوض علينا" ، وعلق Ismail Abo Khadra " النادي الاهلي كبير علي البدري الاهلي عايز مدرب زي جوزيه"، وقال Ahmed Elmlegy " نريد مانويل جوزية بغض النظر عن مبارة الاسماعيلى"، ورهن Neno Angel بقاء البدري بنتيجة مباراتي الترجي قائلاً " انا مع اقاله البدرى ولكن بعد البطوله الافريقيه لما نشوف هيعمل ايه مع الترجى"، وقال Mohamed Hissen " لا للمدرب العربى ونعم للمدرب الاجنبي"، وعلق Mohamed Khedr" الاهلي بقى بيلعب من غير روح من ساعة مامسكه البدري مفيش روح قتالية على الكورة، الادهى والامر ان الاهلي بقى اسوا فريق في العالم بيضغط ع اللعيب اللي معاه الكورة واللعيبة بيستنوا لما الكورة تتقطع وتجايلهم"، وقالت Ayoya Mohamed " هو ماتش تحصيل حاصل اه بس عيب عيب اوي في ناس ماتستهلش تلعب باسم الاهلي زي فرانسيس مثلا"

وقال العضو mega_269 " يا بدري لو بتحب الأهلي استقيل"، وحمل TamerSherif المسؤلية للإدارة قائلاً " الأستقرار لا يعنى الأنتحار البدرى اثبت منذ توليه المهمه انه لا يصلح و لكن هو لا يتحمل الخطأ وحده الأداره مجتمعه تتحمل التلاعب بأسم النادى الأهلى و هيبته"، بينما عبر Mohammed Yousry عن رأيه قائلاً " لا قبل و لا بعد البدري مفلس فنيا في الاساس و فكره التدريبي ينحصر في التفاؤل و الحظ مدرب قعد ثلاث ارباع موسم بيجرب في لاعب زي احمد علي و موسم و نص في فرانسيس و اتي بغدار الي الاهلي عشان نملي بيه خانه بدله الاهلي اكبر من مراحل تطور فكر البدري"، وقال MMk78 " يرحل فى اقرب فرصة"، وحول الاستعانة بمدرب أجنبي خلال هذه الفترة قال pecaso " وجود البدري يعني خروجنا واحتمال فضيحه بنسبة 90% تغير البدري ووجود مدرب اجنبي تعني الهزيمه والصعود بنسبة 50 % للاحتمالين يبقي الأتيان بمدرب في الوقت ده في صالح الفريق وليس العكس"، وتحدث Ultras Ahlawy قائلاً "الاهلي بينهار بسبب البدري شيلو البدري وجيبو مدير فني محترم فنيا اقترح رينار انجولا"، وقال Muhamed Fouda "Invalid Coach"، فيما علق ahlawy3alatool "للأسف لأ لا يمكن يكون الفريق واصل للمستوى المتدني دة معقول كل ماتش بدون خطة ولا جمل تكتيكية و عبارة عن كل واحد ياخد الكورة و يتصرف حسب وضع اللعيبة اللي حواليه ؟! كل ماتش لازم تبدأ بتشكيل غلط و ترجع تصلحه ؟!"

مع الإبقاء على الجهاز الفني

وقال Bebo Noni " معاك يا بدري لاجل الاهلي وعيب اوي كلمة فضيحة"، وكان لـ Ahmed Said رأياً مشابهاً حيث قال " ده مش وقت يمشى فيه مدرب ياجماعه ده لو ساحر مايقدرش يعدل الفريق فى وقت زى ده ....انسب وقت بعد نهايه الدور الاول ...احنا حنعمل زى الزمالك؟"، وعلق Mostafa Mahmoud قائلاً " على فكرة هى مش فضيحة خالص ما تضخموش الامور وانا اؤيد البدرى لاخر الموسم بعد كدة نحاسبه"، وقال Rica Koko " فضيحه ايه بس ده ماتش تحصيل حاصل ولا ليه اى لزمه"، بينما علق Ahmed Mohsen " ايه يا جدعان فى ايه فضيحه ايه مدرب بيلعب من غير شريف اكرامى وائل جمعه سيد معوض حسام عاشور احمد حسن حسام غالى تريكه يعني 7 اساسيين بره التشكيل فى ايه يعنى"، وعلقت Mannona El Banota " وايه المشكلة يعنى انو يخسر سبحان الله وبعدين انتو ليه ناسين اننا اولا اتاهلنا والحمد لله ثانيا ان معظم النجوم مش موجودة يا جماعة عيب علينا اوى كدا لما كل ماتش نعيب على البدرى يا ريت نكون ف ضهر الفريق على طول"، وقال أشرف عيد " ارجو محدش ينسى اننا خسرنا من رينجرز 4/0 والفريق كان كامل ومعرفناش نعوض فى القاهرة واتعادلنا 0/0 ..لكن اليوم لسنا فى احتياج للمباراة وعادى"، وقال أمير الأحزان "فعلا الاهلى خسر من الاسماعيلى 3-0 اما كنا بنلعب بنص الفرقة وباقى الفرقة اصابات واما ابو تريكة اغمى عليه يا جماعة بلاش نحاسب المدرب بالقطعة نحاسبه ببطولات اللى ممكن ياخدها اخر الموسم ولا ايه"، وتحدث Khokha Felfel وقال "يا جماعه لازم نصبر مثلا فلافيو صبرنا عليه قد ايه انتم ليه كده وكان بينزل مبيعملشي حاجه وجوزيه صمم يلعبوا ولا حد اتكلم وبعد كده رفعنا القبعه لجوزيه يا ريت نصبر شويه علي البدري لازم ياخد فرصته واحنا اخدنا بطولات كتير وان شاء الله لينا باذن الله"، وعلق Saber Kamar " طبعا لازم يواصل حتى نهاية المشوار الافريقى والا ستصبح كارثه فى النادى الاهلى بسبب التغير المفاجىء"

بينما قال Mohamed Bekhet " اومال الزمالك اللي بقاله 6 سنين بيخسر يعملو ايه حسام اللي مش عجبكم الماتش ده لو كان كسب كنتو قولته البدري ملوش حل وبلاش سياسه الزمالك ان نحاسب بالماتش ... ومعلش لو كلامي زعل حد"، فيما علق Mostafa Mhmoud " اتمني إن إحنا يكون عندنا وعي ونديله فرصه لغايه ماتش الترجي ونديله عذره ان في ٧لعيبه غائبين ونقف ورا فرقتنا احنا كده بنهدمها"، وقالت Esraa Khafagy " انا مع بقاء البدري وياريت نسانده الفتره الجايه لانها الاهم من دلوقتي بكتير ويارب يجيبوا البطوله واتمني التوفيق للاهلي والبدري في البطوله الافريقيه والدوري المصري ان شاء الله"، وقال Ahmed Kamal " فضيحة اية ياجدعان مااحنا خسرنا تلاتة منهم بردو وجوزية واللعيبة الاساسية كمان وفى القاهرة ارحموا الراجل شوية"، وعبر Mogeeb Abdelglel " لا ياجماعه ماينفعش يمشى دلوقتى لازم نفكر بالعقل لازم يكمل الموسم بأى شكل"

والآن وبعد أن نقلنا العديد من الآراء المختلفة لجماهير القلعة الحمراء ما بين مؤيد ومعارض لبقاء الكابتن حسام البدري وتم تناول أسباب ونتائج الفريق حالياً نترك الأمر في يد مجلس إدارة النادي الأهلي فهو الأقدر على تقييم الأمور حسب حالة الفريق ومعطياته والنتائج الأخيرة وضيق الوقت المتبقي لنصف النهائي على أن يكون في النهاية القرار يصب في مصلحة الأهلي وجماهيره القلقة.